18 persona janë shoqëruar nga policia, kur kanë kaluar një ditë nga ekzekutimi i dy personave në autostradën Tiranë-Durrës, në mbikalimin e Sukthin, ku mbetën të vrarë ish-shefi i Krimit Ekonomik, Ervin Dalipaj dhe miku i tij, Juxhin Dautaj.
Nga sa mësohet personat e shoqëruar janë me precdentë penalë.
Ndërkohë që Policia e Durrësit dhe Prokuroria kanë ngritur dy pista hetimi për ekzekutimin e Ervin Dalipajt dhe mikut të tij Xhino Dautaj; larje hesapesh dhe ajo e hakmarrjes.
Ndërkohë që bëhet e ditur se policia ka sekuestruar në cilësinë e provës materiale dhe pamjet e kamerave të sigurisë përgjatë rrugës, nëpër biznese të ndryshme, çka mund të hedhin dritë për identifikimin e autorëve të ngjarjes. Gjithashtu, nëpërmjet pamjeve filmike pritet të zbulohet edhe makina që përdorën autorët për atentatin.
Burime nga grupi hetimor thanë se janë sekuestruar telefonat e viktimave dhe sendet personale, ku do të verifikohen thirrjet e fundit, pasi nuk përjashtohet dyshimi që ata të jenë nxjerrë në pritë.
Mësohet se mjeti “Audi” me targa AA 111 OI, ku udhëtonin viktimat Ervin Dalipaj dhe Juxhin Dautaj është targuar vitin e kaluar, por nuk është në pronësi të asnjërit prej tyre. Sipas të afërmëve të Dalipaj, ai ishte baba i një fëmije 7 vjeç.
KUSH ISHTE ERVIN DALIPAJ dhe JUXHIN DAUTI
Viktima ishte në kërkim për rrëmbimin dhe vrasjen e Gazmend Çollakut vjen nga radhët e forcave të rendit dhe nga poste jo pak të rëndësishme. Ja cili është ai:
Ervin Dalipaj, 37 vjeç, banues në Tiranë;
Profesioni: ish-oficer policie në Shërbimin e Kontrollit të Brendshëm;
Ish-shef i Seksionit Kundër Krimit Ekonomik në Drejtorinë e Policisë së Tiranës;
I përjashtuar nga radhët e uniformave blu në 1 dhjetor 2013, me motivacionin për “dekonspirim të operacionit për lojrat e fatit”.
29 janar 2016. Shpallet në kërkim me shkresën numër 830, pasi Gjykata e Shkallës së Parë për Krimet e Rënda cakton masën e sigurisë “arrest me burg”.
Ndaj Dalipaj rëndojnë veprat penale “rrëmbim ose mbajtje peng të personit”, e kryer në bashkëpunim dhe “prodhim dhe mbajtje pa leje e armëve luftarake”.
Viktima tjetër e atentatit të Sukthit është Juxhin Dauti. Ai u përfshi si i dyshuar në vrasjen e kampionit të bilardos në Vlorë, Fatjon Banaj. Megjithatë, kjo akuzë nuk u provua dhe Dauti kishte marrë pafajësinë në gjykatë.
